رقم ہو کب صفت تیری معین الدین اجمیری

رقم ہو کب صفت تیری معین الدین اجمیری

وہ عالی شان ہے تیری معین الدین اجمیری

بیاں رتبہ ہو کیا تیرا کہاں مقدور یہ میرا

کہ ذات لامکاں تیری معین الدین اجمیری

تو قطب الدین فریدالدین علاؤالدین نظام الدین

یہ شان پنجتن تیری معین الدین اجمیری

زمین و آسماں تیرا مکان و لامکاں تیرا

فلک پر دھوم ہے تیری معین الدین اجمیری

وسیلہ بے نواؤں کا ہے سلطاں بادشاہوں کا

دہائی کیوں نہ دوں تیری معین الدین اجمیری

تو ہی ہادی ہدایت کا تو ہی والی ولایت کا

فقیری شان ہے تیری معین الدین اجمیری

تو ہی ہے پیر پیروں کا تو ہی وارث صغیروں کا

حکومت ہر جگہ تیری معین الدین اجمیری

مرا دریائے وحدت سے ہو بیڑا پار اے مولیٰ!

تو کشتی پار کر میری معین الدین اجمیری

ترے در پر جو آتا ہے مطالب اپنے پاتا ہے

سخی سرکار ہے تیری معین الدین اجمیری

بلا لے شمسؔ کو صدقہ علاؤالدین صابر کا

حضوری میں رہوں تیری معین الدین اجمیری