مری مستی پہ شیخ و محتسب تعذیر کیا دیں گے

مری مستی پہ شیخ و محتسب تعذیر کیا دیں گے

اجی میں بادہ کش ہوں ساقیٔ کوثر کے یثرب کا

رقابت کا کسی کو غم نہیں سب اس کے عاشق ہیں

خصوصیت ہے سب کے ساتھ وہ محبوب ہے سب کا

میں ہوں تلمیذ رحماں اے شرر میرا وہ رتبہ ہے

کہ جبریل امیں اک طفل ابجد خواں ہے مکتب کا

یہ محبوبی کا رتبہ ہے خدا بھی تجھ کو بلوا کر

شب معراج تھا مشتاق تیری آمد آمد کا

خطر کیا موج طوفان بلا سے کشتیٔ دل کو

لکھا ہے میں نے مثل نوح نام اس پر محمد کا

رخ پر نور پر صلی علیٰ ریش مطہر کو

فرشتے کہتے ہیں شیرازہ قرآن مجلد کا

گواہی تیری یکتائی کی دوں گا بعد مردن بھی

جمے گا شکل انگشت شہادت سبزہ مرقد کا

قصیدہ پر شررؔ کے صاد کرنے کی تمنا ہے

اتر آئے زمیں پر یہ ارادہ ہے عطا رد کا