کرم ہے سرورِ دیں کا عنایت مرتضیٰ کی ہے

کرم ہے سرورِ دیں کا عنایت مرتضیٰ کی ہے

مزارِ پیر محی الدین پر رحمت خدا کی ہے

تمہارے روبرو ہو کر تمہیں جی بھی کے میں دیکھوں

تمہیں تکتا رہوں حسرت دل بے مدعا کی ہے

یہ مرے دل سے پوچھو رخ کو دیکھو اور پہچانو

میرے ماتھے کے اوپر یہ نشانی نقشِ پا کی ہے

ابھرتے جارہے ہیں نقشِ الفت اور بھی دل میں

محبت جب سے دل میں بس گئی آل عبا کی ہے

میرے ہادی سلامت تم رہو فیضانِ مسند پر

خدا سے عاجزانہ ہر گھڑی یہ التجا کی ہے

کہیں گے حشر میں بھی دیکھنا وابستۂ دامن

عنایت ہم پہ کتنی حضرتِ غوث الوریٰ کی ہے

انہی کے ہو کے رہنا ان پہ مٹنا اور مرجانا

یہی اک آرزو میں نے ذبیحؔ صبح و مسا کی ہے