محی کی ہستی بھی واللہ کیا ہستی بلا کی ہے

محی کی ہستی بھی واللہ کیا ہستی بلا کی ہے

کہ جس کی شکل میں پوشیدہ صورت مصطفیٰ کی ہے

ہو ’’مجذوب المجاذیب‘‘ اے ’’محی‘‘ پھر پوچھنا کیا ہے

مجھے حاجت تمہارے جذبِ مستانہ ادا کی ہے

مرے ہر دور کا دارالشفا ہے آستان تیرا

اطبا کی ضرورت نہ مجھے حاجت دوا کی ہے

خدا کی ذات میں ہو کر فنا پائے ‘‘بقا‘‘ ہو تم

مرا ایماں ہے خاصیت یہی سب اؤلیا کی ہے

وہی درویش کامل ہے قلندر جس کو کہتے ہیں

مکمل جس کو حاصل معرفتِ صوت و صدا کی ہے

وہی بھرتے ہیں دم انی انا کا دمبدم جن کا

مقدر بن چکی جو معرفت ’’انی انا‘‘ کی ہے

وہ دیکھو نور کی جھرمٹ میں بن کر عرس کی رونق

مزارِ پیر محی الدین پر رحمت خدا کی ہے

پلایا جب سے ہے پیر مغاں نے جام عرفاں کا

مرے پیشِ نظر دل میں عیاں صورت خدا کی ہے

مرے سینے میں جو کچھ بھی ہے دولت علم عرفاں کی

عطا کردہ وہ فیضان شہنشاہِ دنیٰ کی ہے

یہ دنیا ہو کہ عقبیٰ ہو یہ مرقد ہو قیامت ہو

مدد مجھ کو ہمیشہ ذات احد و احمد کی ہے

نہ لا کر تاب یہ جوشِ جنونِ عشق کی اے شیخؔ

زمیں پر آگیا ہوں میں مشیت یہ خدا کی ہے