اک برہمن ہند تجھے پیار کرے ہے

اک برہمن ہند تجھے پیار کرے ہے

چوٹی سے ہمالہ کی نمسکار کرے ہے

جو برہم کو جانے اسے کہتے ہیں برہمن

کچھ جان کر اپنا تجھے آدھار کرے ہے

ہے اکھیاں میں اس کے شب معراج کا منظر

وہ موند کے آنکھیں ترا دیدار کرے ہے

محرم ہے ترے فیض سے توحید خدا کا

کثرت کے ہر اک رنگ کا ستکار کرے ہے

ہے عرش بریں تیرے لیے صاحب لولاک

قرآن تری عظمت ہی کا اظہار کرے ہے

تو صاحب یٰسین تو ہی صاحب طہٰ

قرآن ہے شاہد کہ خدا پیار کرے ہے

بے تیغ و سناں ایک فقط کلمۂ حق سے

تو قیصر و کسریٰ کو نگوں سار کرے ہے

رحمت ہے در عالم کے لیے تیری تجلی

تجھ پر ہی بھروسہ یہ گنہگار کرے ہے

ہے اور ہی عالم میں ترا عاشق جاویدؔ

تیری ہی محبت ہے جو سرشار کرے ہے