یا نبی ہو گا کب بے نوا پر کرم کب مدینے سے میرا پیام آئے گا

یا نبی ہو گا کب بے نوا پر کرم کب مدینے سے میرا پیام آئے گا

آپ کی بارگاہِ پُرانوار میں کب سلامی کی خاطر غلام آئے گا

دل میں مدت سے ہے آرزوئے حرم کب مدینے میں آئیں گے سرکار ہم

کب سکوں پائے گی یہ مری چشمِ نم کب حضوری میں یہ تشنہ کام آئے گا

دید جب ہوگی آقا کے دربار کی عید ہو جائے گی مجھ گناہ گار کی

رنگ لائے گی پھر میری دیوانگی جذبۂ دل مرا میرے کام آئے گا

رحمتِ مصطفیٰ کی پھر آغوش میں بہرِ رحمت بھی آئے گا پھر جوش میں

سر بہ خم چشمِ نم ہاتھ باندھے ہوئے ان کے در پہ جب ان کا غلام آئے گا

اپنی آنکھوں میں اشکِ ندامت لیے جائے گا جو درِ شاہِ کونین پر

کیسا ہی عاصیِ پُر خطا ہو مگر لے کے بخشش میں اپنی انعام آئے گا

زائرینِ مدینہ کا کیا ذکر ہے ہوں گے ملکوت بھی عالمِ وجد میں

عالمِ کیف و مستی میں پڑھتا ہوا جب سکندرؔ درود و سلام آئے گا