اک غلامِ نبی کی بفضلِ خدا ہوگئی عرض منظور سرکار میں

اک غلامِ نبی کی بفضلِ خدا ہوگئی عرض منظور سرکار میں

بخت چمکا مرادِ دلی مل گئی ہم چلے اپنے آقا کے دربار میں

اللہ اللہ یہ ان کا جود و کرم اللہ اللہ یہ ان کا لطف و کرم

ان کی اک چشمِ رحمت سے سب مٹ گئی جتنی سوزش تھی قلبِ گنہگار میں

بے کسی میں دوعالم کے مشکل کشا بن گئے میری کشتی کے خود ناخدا

اس کریمی کے قربان صلِ علیٰ کیا وسیلہ ملا مجھ کو منجدھار میں

چشم فرطِ مسرت سے پُر آب ہے روح رعبِ جلالت سے بے تاب ہے

ایک عاصی و مجرم کی ہے حاضری تاجدارِ دوعالم کے دربار میں

غم کے بادل چھٹے اذنِ طیبہ ملا رنجِ دوری مٹا ضعفِ فرقت گیا

دل کی کلیاں کھلیں روح شاداں ہوئی اک سکوں آ گیا قلبِ بیمار میں

اے سکندرؔ بہ لطفِ حبیبِ خدا بن کے ہم بلبلِ باغِ مدح و ثنا

رب نے چاہا تو پھر چند ہی روز میں جا کے چہکیں گے طیبہ کے گلزار میں