زباں پر جو ذکرِ حبیب آ گیا ہے

زباں پر جو ذکرِ حبیب آ گیا ہے

زباں کو مزہ بھی عجیب آ گیا ہے

سنایا ہے جس نے ہمیں کنت کنزاً

زمانے میں اب وہ خطیب آ گیا ہے

جو اہلِ نظر ہیں وہی جانتے ہیں

خدا خود بشکل حبیب آ گیا ہے

خبر لیجئے یا نبی غم زدوں کی

زمانہ عجیب و غریب آ گیا ہے

مسیحا سے کہہ دو کہ جائے یہاں سے

میرے دردِ دل کا طبیب آ گیا ہے

نکل جائےگا دل سے اب خار حسرت

کہ گلزار طیبہ قریب آگیا ہے

زہے بخت اس کے زہے اس کی قیمت

تیرے در پہ جو خوش نصیب آ گیا ہے

چلو سجدہ کرتے ہرہر قدم پر

کہ نزدیک کوئے حبیب آ گیا ہے

نکل کر ہو قربان اے جان صوفیؔ

شہ دیں کا روضہ قریب آ گیا ہے