ترے ہی ذکر سے یہ نظم و اہتمامِ سخن

ترے ہی ذکر سے یہ نظم و اہتمامِ سخن

ترے ہی حرف سے، شیریں ہوا ہے کامِ سخن

سپہرِ شعر ہوا، تجھ سے مطلعِ انوار

تو شمعِ بزمِ سخن ہے، تو مہر ِ بامِ سخن

کہا ہے ژرف شناسانِ شعر نے تجھ کو

خدیو مملکتِ شاعری، امامِ سخن

ترے خیال سے، آرائشِ رخ و گیسو

تجھی سے صبحِ سخن ہے، تجھی سے شامِ سخن

ہے تیرے ذکر سے معمور، محفلِ شیراز

بلند تجھ سے ہوا کس قدر، مقامِ سخن

کسی کا فیضِ نظر، ہے شریکِ حال ترا

ملی ہے تجھ کو جو یہ دولتِ دوامِ سخن

تری بہارِ سخن، گل فروشِ دشت و چمن

ہر اک دیار پہ برسا ترا غمامِ سخن

ہے تیری بزم میں پاکوب شاہدِ معنی

ہے تیرے قدموں میں، محبوبِ لالہ فامِ سخن

ہر ایک تار ہے سازِ سخن کا زخمہ فریب

نہ اعتبارِ سخن ہے، نہ احترامِ سخن

ہیں جرعہ خوار ترے کب سے تشنہ و محروم

نہیں ہے کوئی جو گردش میں لائے جامِ سخن

اٹھ اور اپنے اس اعجازِ خسروی سے ذرا

درست از سرِ نو کر دے تو نظامِ سخن