تم آلِ پیمبر ہو، ولی ابنِ ولی ہو

تم آلِ پیمبر ہو، ولی ابنِ ولی ہو

حسنین کے دلبر بھی ہو تنویرِ علی ہو

اک بات بھی ایسی نہیں ملتی ہے تمہاری

جو تم نے کہی ہو تو وہ پوری نہ ہوئی ہو

جس جس کا بھی دامن ہے بھرا اس نے کہا ہے

تم ابنِ سخی ابنِ سخی ابنِ سخی ہو

دے دے مجھے حسنین کے صدقے میں مرے شاہ

وہ چیز جو قسمت میں ہو بہتر ہو بھلی ہو

بخشا ہے خدا نے تمہیں وہ رتبۂ اعلیٰ

تم ابنِ ولی ابنِ ولی ابنِ ولی ہو

اے والیِ بکوا، ہے تری شان نرالی

تم نائبِ خواجہ پیا اور غوثِ جلی ہو

اے کاش کہ موجود رہوں میں بھی کسی دن

ہاں جب کبھی محفل مرے مسلم کی سجی ہو

کیا خاک زمانے کی وہ مشکل سے ڈرے گا

جس دل میں بھی الفت مرے مسلم کی بسی ہو

آئیں نہ بھلا شاہ و گدا در پہ ترے کیوں

ہر وقت غلاموں کی جہاں بات بنی ہو

کیوں کر نہ تری چاہ میں تڑپے وہ شب و روز

جس دل میں ترے عشق کی ہاں آگ لگی ہو