کیا بتاؤں آپ کو کیا ہے وقارِ فاطمہ

کیا بتاؤں آپ کو کیا ہے وقارِ فاطمہ

ہے زمیں سے آسماں تک اقتدارِ فاطمہ

عظمت و شانِ جنابِ فاطمہ کرنے رقم

لفظ لائے کس طرح مدحت نگارِ فاطمہ

بے اجازت جن کے گھر جبرئل بھی جاتے نہیں

یہ بھی تو ہے اک طرح کا افتخارِ فاطمہ

حشر تک دینِ الہٰی کی بقا کے واسطے

جا رہا ہے رن میں دیکھو شہسوارِ فاطمہ

ہے حدیثوں میں لکھا یہ قولِ بی بی عائشہ

ہوبہو احمد سا ہے نقش و نگارِ فاطمہ

جو فرشتہ موت کا آئے تو واپس بھیج دیں

اللہ اللہ دیکھیے تو اختیارِ فاطمہ

اک سے قائم امن ہے اور ایک سے دیں کی بقا

ایک دل ہے اور اک جانِ قرارِ فاطمہ

ظالموں کے ہاتھ سے کرب و بلا کی ریت پر

ایک ہی دن میں لٹا باغِ بہارِ فاطمہ

حر بتاتے ہیں ہمیں شبیر پر ہو کر فدا

اس طرح ہوتے ہیں دیکھو جاں نثارِ فاطمہ

جس کے در سے روٹیاں لے کر ملک جاتے رہے

کس بلندی پر ہے دیکھو تو دیارِ فاطمہ

اپنی بخشش کے لیے تم بھی چلو اے عاصیو

خلد کو جاتی ہے سیدھا رہ گزارِ فاطمہ

ہے تمنا یہ حسنؔ کی موت سے پہلے خدا

دیکھ لے جی بھر کے آنکھوں سے مزارِ فاطمہ