کب بیاں ہوگا کسی سے مرتبہ عباس کا

کب بیاں ہوگا کسی سے مرتبہ عباس کا

اؤلیا کہتے ہیں خود کو جب گدا عباس کا

ظالموں کے درمیاں تنہا کھڑا ہے باخدا

کس بلندی پر ہے دیکھو حوصلہ عباس کا

جب کہیں آیا وفا کا تذکرہ محفل میں تو

نام اس دم لب پہ میرے آ گیا عباس کا

روک رکھا ہے اشاروں سے ہی فوجِ شام کو

واللہ رے یہ خوف اور یہ دبدبہ عباس کا

کٹ گئے تھے ہاتھ کربل میں مگر دیکھو ذرا

آج بھی جاری ہے لوگوں بانٹنا عباس کا

اتنی سی خواہش حسنؔ کی کر مرے مولیٰ قبول

میرا سر ہو اور ہو در بادشاہ عباس کا