نبی کے لعل شہِ اؤلیا کا چہلم ہے

نبی کے لعل شہِ اؤلیا کا چہلم ہے

جہانِ خلق میں شاہِ وفا کا چہلم ہے

بچھا ہے فرشِ عزا آج عرشِ اعظم پر

ملک بھی گریہ کناں ہے شہیدِ اعظم پر

زمیں پہ ناصرِ دینِ خدا کا چہلم ہے

جہانِ خلق میں شاہِ وفا کا چہلم ہے

مدینے لوٹ کے آئی ہے بے ردا زینب

پکارتی ہے یہ غازی کو با حیا زینب

شہیدِ دشتِ ستم کی قبا کا چہلم ہے

جہانِ خلق میں شاہِ وفا کا چہلم ہے

کٹائے ہاتھ مگر پرچمِ وفا نہ گرا

سرِ حسین کٹا عزمِ کربلا نہ گرا

اصولِ دینِ نبی کی بقا کا چہلم ہے

جہانِ خلق میں شاہِ وفا کا چہلم ہے

لوائے حق کو اٹھائے ہوئے ہیں زائر بھی

پکارتے ہیں عزادار بھی اور شاعر بھی

خدا کے پیارے حبیبِ خدا کا چہلم ہے

جہانِ خلق میں شاہِ وفا کا چہلم ہے

غمِ حسین تو ہر ایک دل میں بستا ہے

خدا تلک تو یہی اربعیں کا رستہ ہے

دلوں کے چین شہِ کربلا کا چہلم ہے

جہانِ خلق میں شاہِ وفا کا چہلم ہے

حسنؔ مٹانے چلے تھےجو آلِ اطہر کو

مٹا نہ پائے مگر آج بھی بہتّر کو

یہ چہلم آج اسی مردِ خدا کا چہلم ہے

جہانِ خلق میں شاہِ وفا کا چہلم ہے