سبز گنبد کی فضاؤں کا سفر مانگتے ہیں

سبز گنبد کی فضاؤں کا سفر مانگتے ہیں

ہم کسی روز مدینے کی سحر مانگتے ہیں

نعت بنتے ہوئے آنکھوں میں گہر آ جائیں

اپنی مدحت سے دعاؤں میں اثر مانگتے ہیں

ہر طرف مولیٰ کے ہم نقشِ کفِ پا دیکھیں

جس پہ حسنین کا جلوہ ہو وہ در مانگتے ہیں

دوڑ کر ان کے اشارے پہ شجر آ جاتے

ان کو شاخوں میں چھپاتے وہ شجر مانگتے ہیں

اپنی قسمت میں بھی سرکار کی بستی لکھ دے

جس میں سرکار کا مسکن تھا وہ در مانگتے ہیں

دنیا داروں سے پزیرائی کا لالچ کب ہے

اپنے آقا سے پزیرائی کا زر مانگتے ہیں

جب ارادہ ہو غزل کا تو رقم ہو مدحت

ایسا دلدار کی مدحت کا ہنر مانگتے ہیں

کب سے میلاد منانے کے لیے دنیا میں

جو بھی آکاش کی مانند ہو گھر مانگتے ہیں

رب سے ناموسِ رسالت کے لیے ہم قائمؔ

جس میں للکار کی جرات ہو جگر مانگتے ہیں