وہی مقدم، وہی مؤخر، انہی پہ ساری عطا ہوئی ہے

وہی مقدم، وہی مؤخر، انہی پہ ساری عطا ہوئی ہے

انہی سے اک ابتدا ہوئی تھی، انہی پہ اک انتہا ہوئی ہے

وہ نورِ اول کی بے نقابی، وہ جلوۂ حق کی بے حجابی

وہ ذات جس کے کرم سے فکرِ بشر خدا آشنا ہوئی ہے

وہ کیا بشر تھے کہ زیرِ ظلِ رحیم خود بھی رحیم ٹھہرے

وہ کیسے امی تھے جن سے سارے علوم کی ابتدا ہوئی ہے

جلیل ایسے کہ ساری دنیا کی عظمتیں ان کے زیرِ پا ہیں

جمیل ایسے کہ ان پہ اطلاقِ حسن کی انتہا ہوئی ہے

میں ان کے روضے کی جالیوں پر ہمیشہ اک بات سوچتا ہوں

کہ عاجزوں، بیکسوں پہ رب علا کی کیسی عطا ہوئی ہے