اے برجِ رسالت کے نیر، اے حاصل اقلیمِ داور

اے برجِ رسالت کے نیر، اے حاصل اقلیمِ داور

تو عشق کی نظروں کا محور، تو عقل کی راہوں کا رہبر

کوثر میں دھلی تیری باتیں، خوشبو میں دھلا تیرا پیکر

اے جانِ جہاں تیری ہستی کونین کے ماتھے کا جھومر

اے مونس ہر قلب مضطر، اے چارہ گر ہر دیدۂ تر

ادبار کی جلتی دھوپ میں تیری ذات اک سایہ دار شجر

اے فخرِ بشر معراج تری تاروں کا سفر، گردوں پہ گزر

معراج مری بس طیبہ کے دیوار و در پر ایک نظر

اے تاجورِ لولاک لما، تعبیرِ وما ارسلنک

کیا حور و ملک، کیا جن و بشر، دارین ترے دریوزہ گر

ہر سانس حیاتِ اطہر کا تفسیرِ رضائے ربانی

سیرت سے تری انساں پہ کھلے قرآن کے در عرفان کے در

ہر حال میں بحرِ صدق و صفا، ہر رنگ میں مخزنِ جود و سخا

غربت میں بھی تو سائل پرور، عسرت میں بھی تو آسودہ نظر

تو خسروِ کشورِ علم و یقیں، توضیح زماں، توجیہ زمیں

توفیقِ ثنا بھی تیری عطا، اے مدح و ثنا سے بالا تر