بہ حضورِ سرورِ سروراں، بہ جنابِ مرسلِ مرسلاں

بہ حضورِ سرورِ سروراں، بہ جنابِ مرسلِ مرسلاں

مری فکر عاجز و ناتواں، مرا نطق عاری و بے زباں

پئے مدحِ خواجۂ خواجگاں، لغتِ بشر میں سکت کہاں

کبھی اشک لفظوں میں ڈھل سکیں تو ہوں وارداتِ دلی بیاں

وہ ہدایتِ ہمہ انس و جاں، وہ قیادتِ ہمہ کارواں

وہ شفاعتِ ہمہ عاصیاں، وہ سکوں کا ساحلِ بیکراں

نہ طریق و رسمِ سکندری، نہ شعارِ دارا و قیصری

مگر ایک فقرِ پیمبری کہ نثار سطوتِ سروراں

وہ عطائے رب جلیل ہیں، وہ کمالِ حق کی دلیل ہیں

وہ جمالِ دلبرِ دلبراں، وہ جلالِ خسروِ خسرواں

وہی پاسبانِ حرم بھی ہیں، وہی شاہِ ملکِ ارم بھی ہیں

وہی شانِ خیر امم بھی ہیں، وہی جانِ عالم قدسیاں

وہ یقین و علم کی تازگی، وہ دل و نظر کی کشادگی

وہ فراز و شوکتِ بندگی، وہ جواز و حاصل کن فکاں

وہ حبیبِ رب قدیر ہیں، دو جہاں کے بدرِ منیر ہیں

وہ بشیر ہیں، وہ نذیر ہیں، وہی چارہ سازِ غمِ نہاں