اے ختمِ خیلِ انبیا، خیرالبشر، خیرالوریٰ

اے ختمِ خیلِ انبیا، خیرالبشر، خیرالوریٰ

ہر ابتدا کی انتہا، خیرالبشر، خیرالوریٰ

گنجینۂ لطف و عطا، خیرالبشر، خیرالوریٰ

سر چشمۂ جود و سخا، خیرالبشر، خیرالوریٰ

مشرق سے مغرب تک ضیا، صل علیٰ بدر الدجیٰ

آرائشِ صبح و مسا، خیرالبشر، خیرالوریٰ

فرشِ زمیں سے عرش تک بس ایک قدرِ مشترک

محبوبِ ذاتِ کبریا، خیرالبشر، خیرالوریٰ

رنگِ بہارِ جاں فزا، آہنگِ موجِ ارتقا

اک نکہتوں کا قافلہ، خیرالبشر، خیرالوریٰ

قیدِ زماں سے ماورا، دارین پر پھیلا ہوا

اک رحمتوں کا سلسلہ، خیرالبشر، خیرالوریٰ

اے سائرِ عرشِ علا، اے محفل آراے دنیٰ

تو زینتِ ارض و سما، خیرالبشر، خیرالوریٰ

تو باعثِ ہر جز و کل، شانِ رسل، نورِ سبل

اے نیرِ برجِ ہدیٰ، خیرالبشر، خیرالوریٰ

اپنوں کا بھی تجھ سے بھرم، غیروں پہ بھی تیرا کرم

تو بے نواؤں کی نوا، خیرالبشر، خیرالوریٰ

تو مقصد و مقصودِ ما، تو شاہد و مشہود ما

تو مظہرِ معبودِ ما، خیرالبشر، خیرالوریٰ

انت الذی لو لا ک لم، نعرف مقاماتِ الہدیٰ

مہرِ سپہرِ ہل اتیٰ، خیرالبشر، خیرالوریٰ