نازش کونین فخر زندگی ہیں فاطمہ

نازش کونین فخر زندگی ہیں فاطمہ

تاجدارِ انبیا کی لاڈلی ہیں فاطمہ

مادرِ حسنین کی صورت میں عالم کے لیے

شاہ راہِ زندگی کی روشنی ہیں فاطمہ

جن کو آقا نے دیا خاتونِ جنت کا لقب

ہاں وہی ہیں ہاں وہی ہیں ہاں وہی ہیں فاطمہ

ہے ہماری سوچ سے آگے بہت ان کا مقام

یہ شرف کچھ کم نہیں بنتِ نبی ہیں فاطمہ

ان سے راضی ہے خدا اور ان سے آقا بھی ہیں خوش

ہر دلِ مؤمن میں بھی بیٹھی ہوئی ہیں فاطمہ

زوجۂ شیرِ خدا ہیں بات اتنی ہی نہیں

مؤمنو! شہزادی فردوس بھی ہیں فاطمہ

حضرتِ صدیق کی فاروق کی عثمان کی

قدردانِ خدمتِ اسلام بھی ہیں فاطمہ

فاطمہ زہرا کا ہر اسوہ ہے جز و ایمان کا

تابشِؔ مہدی! متاعِ آگہی ہیں فاطمہ