دل میں ہے تیری عظمت لب پر ہے نام تیرا

دل میں ہے تیری عظمت لب پر ہے نام تیرا

تجھ سا نہیں ہے کوئی یکتا مقام تیرا

انسان جن فرشتے دریا پہاڑ جنگل

سب اپنی اپنی لے میں لیتے ہیں نام تیرا

تیری ہے حکمرانی ارض و سما پہ مولیٰ

تو خالق جہاں ہے عالم تمام تیرا

ہر برگ ہر شجر میں پوشیدہ تیری قدرت

سارے جہاں میں ہے جاری نظام تیرا

بڑھ جائے چاہے جتنا بونا ہی وہ رہے گا

کس طرح دیکھ پائے انسان بام تیرا

ممکن نہیں ہے خامی کاری گری میں تیری

قدرت ہے تیری کامل ہر کام تام تیرا

تیری بلندیوں کا ادراک ہو رہا ہے

زیرِ مطالعہ ہے جب سے کلام تیرا

تجھ کو ادھر اُدھر کیوں میں ڈھونڈنے کو نکلوں

رہتا ہے مؤمنوں کے دل میں قیام تیرا

مسلم ہوں یا کہ ہندو عیسائی ہو کہ سکھ ہوں

دل میں بشر بشر کے ہے احترام تیرا

تیرا ہی نام لب پر رہتا ہے ہر کسی کے

کام آنا ہر کسی کے تیرا ہے کام تیرا

ہم ایسے عاصیوں کو توفیق دے الٰہی

پہنچائیں جاکے گھر گھر ہم بھی پیام تیرا

پھرتا رہا مگن وہ وحدت کے گلشنوں میں

جس نے بھی پی لیا اک بار جام تیرا