تڑپ رہا ہے بہت دل مرا غریب_نواز

تڑپ رہا ہے بہت دل مرا غریب نواز

بلائیے مجھے پھر جلد یا غریب نواز

ادھر بھی گوش توجہ ہو یا غریب نواز

غریبوں کی بھی سنو التجا غریب نواز

غریب ہم ہیں غریبوں کے آپ آقا ہیں

ہمارا ہاتھ ہے پھیلا ہوا غریب نواز

تمہارے پاس تو سب کچھ ہے بادشاہ ہو تم

مجھے ہو فقر کی دولت عطا غریب نواز

نگاہ فیض کا کب سے امیدوار ہوں میں

ادھر بھی دیکھیے بہر خدا غریب نواز

ہے فیصلہ مری قسمت کا آپ کے ہاتھوں

سنا دو حکم اخیر اب تو یا غریب نواز

حضور اب مری تقدیر کی گرہ کھولیں

لقب ہے آپ کا عقدہ کشا غریب نواز

عجیب شہر ہے اجمیر ہے یہ دار الخیر

تمہیں نے اس کو یہ رتبہ دیا غریب نواز

سوائے آپ کے اب ہم غریب جائیں کہاں

لقب تو آپ کو حق نے دیا غریب نواز

بیان کرنے کی حاجت نہیں حضور مجھے

عیاں ہے آپ پہ سب حال یا غریب نواز

کمال مضطر و ششدر ہے آپ کا اکبرؔ

بلائیے اسے اب جلد یا غریب نواز