طفیلِ غوثِ اعظم یہ نوازش مصطفیٰ کی ہے

طفیلِ غوثِ اعظم یہ نوازش مصطفیٰ کی ہے

’’مزارِ پیر محی الدین پر رحمت خدا کی ہے‘‘

گزاری زندگی اپنی محی الدین نے ایسی

شریعت پر رہے قائم نبی کی اقتدا کی ہے

دعا بن کر کرامت سامنے آئی زمانے کے

محی الدین نے کوئی خدا سے جب دعا کی ہے

یہاں آ کر کوئی سائل کبھی خالی نہں لوٹا

خدا کا فضل ہے ان پر عطا غوث الوریٰ کی ہے

قدم اٹھتے تو ہیں آقا مگر بڑھتے نہیں آگے

ضرورت ہم غلاموں کو تمہارے نقش پا کی ہے

ہر اک بگڑے مقدر کو بنانا کام ہے ان کا

خدائے پاک نے قدرت انہیں ایسی عطا کی ہے

تمہارا ہو کہ بھی طاہرؔ تمہاری دید کو ترسے

یہی منشا تمہارا ہے کہ یہ مرضی خدا کی ہے