بندگی رب کی کرو یہ بات آقا نے کہی

بندگی رب کی کرو یہ بات آقا نے کہی

آؤ لوگو! صدقِ دل سے کر لیں رب کی بندگی

ہے تکبر اس کو زیبا خالق و مالک ہے وہ

حکم چلتا ہے اسی کا اس کو حاصل برتری

آب و گل شمس و قمر بادِ صبا اور آسماں

عقل حیراں دیکھ کر ہے نعمتیں یہ قدرتی

کس نے دیکھا ہے خدا کو کون سمجھا ہے اسے

سیدِ عالم کے ذریعے سے ملی ہے آگہی

فیصلہ اللہ نے یوں کردیا قرآن میں

سرفرازی ہے اسی کو جو بڑا ہے متقّی

حمد رب نعت رسول پاک عنواں جس کا ہو

سب سے افضل سب سے بہتر ہے وہی تو شاعری

رب عالم تیری طاعت اور ترے محبوب کی

تیرے کہنے کے مطابق کر سکیں ہم پیروی

ربِ عالم جب کسی سے راضی ہو جائے تو پھر

اس کے گھر کا راستہ معلوم کرتی ہے خوشی

موت کو بھی یاد رکھنا فکرِ محشر بھی رہے

لمحہ لمحہ کہہ رہی ہے تجھ سے طاہرؔ زندگی