اطاعت ربِ اعلا کی سعادت ہی سعادت ہے

اطاعت ربِ اعلا کی سعادت ہی سعادت ہے

خدائے پاک سے دوری ندامت ہی ندامت ہے

خدا بھی راضی ان بندوں سے ہوگا غور سے سن لو

کہ جن کو سرورِکونین سے الفت ہے چاہت ہے

یہ کلیاں پھول جگنو تتلیوں کا رقصِ دل داری

حسیں شہکار ہیں ان میں خدا کی خاص ندرت ہے

ہمیں قرآں بتاتا ہے سمجھتے کیوں نہیں لوگو

خدا کی یاد سے غفلت قیامت ہے قیامت ہے

لکھو حمدِ خدا اور حمد کی محفل میں آ جاؤ

اسی میں کامیابی اور راحت ہے سکینت ہے

زمین و آسماں صحرا سمندر جن و انساں بھی

مرے مولیٰ ترے خلاق ہونے کی شہادت ہے

کرو اس کی حفاظت بھی عطائے خاص ہے لوگو

یہ جسم و روح بھی ربِ حقیقی کی امانت ہے

یہ تحفہ خاص ہے رب کا مہینہ صوم کا واللہ

خدا کی رحمتیں اس میں عنایت ہی عنایت ہے

سفر جاری جہانِ حمد کا اٹھارہ برسوں سے

جہانِ حمد کا پیغام طاہرؔ فتح و نصرت ہے