جس میں ہو تیری رضا ایسا ترانہ دے دے

جس میں ہو تیری رضا ایسا ترانہ دے دے

اپنے محبوب کی نعتوں کا خزانہ دے دے

شہرِ مکہ میں مجھے گھر کوئی مل جائے یا پھر

شہرِ طیبہ کی مجھے جائے یگانہ دے دے

ان کی نعلین کروں صاف یہی حسرت ہے

ربِ عالم مجھے اک ایسا زمانہ دے دے

نوکری تیری کروں آئینہ کرداری سے

اجرتِ خاص مجھے ربِ زمانہ دے دے

آج تک مجھ کو سنبھالا ہے کرم نے تیرے

جب میں گرنے لگوں آ کر کوئی شانہ دے دے

ہو رضا جس میں تری اور تیرے پیارے کی

حمد اور نعت مجھے ایسی یگانہ دے دے

سادگی کا مجھے پیکر کہیں دنیا والے

زندگی ایسی مرے مولیٰ شہانہ دے دے

حجِ مبرور کی حاصل ہو سعادت مجھ کو

حاضری کا مجھے اک خاص بہانہ دے دے

یاد آتے ہیں مناظر وہی نوری مجھ کو

ان مناظر کا مجھے آئینہ خانہ دے دے

آئینہ جیسا ہو کردار جہاں میں میرا

رحمتوں والا مجھے آب دے دانہ دے دے

خواہشِ طاہرؔ سلطانی یہی ہے مولیٰ

عشقِ سرکارِ دوعالم کا خزانہ دے دے