اس واسطے ہم صورت_رنجور پڑے ہیں

اس واسطے ہم صورت رنجور پڑے ہیں

تیرے در دولت سے بہت دور پڑے ہیں

رکھے تیرے خم خانہ کو اللہ سلامت

مستان ازل سیکڑوں مخمور پڑے ہیں

تقدیر میں لکھی ہی نہیں قربت خواجہ

افسوس کہ اجمیر سے ہم دور پڑے ہیں

تیرے در اقدس پہ شہ ملک ولایت

سر اپنا جھکائے ہوئے مغرور پڑے ہیں

بتی یہ چراغ تن تیرہ میں ہے روشن

یا زخم جگر میں مرے ناسور پڑے ہیں

دیکھو تو ذرا کیف مئے الفت مولیٰ

قسمت کو دعا دیتے ہیں مسرور پڑے ہیں

کیا ایک تمہیں واصف خواجہ ہو تجملؔ

تم سے تو بہت شاعر مشہور پڑے ہیں