بیٹھے ہوئے ہیں کب سے بالیں پہ آئے خواجہ

بیٹھے ہوئے ہیں کب سے بالیں پہ آئے خواجہ

کھل اے زباں کہ کر لوں شکر عطائے خواجہ

اللہ مجھ کو رکھے محو لقائے خواجہ

دیکھا کریں نگاہیں ہر دم ضیائے خواجہ

ابروئے حور کے ہوں کشتے جناب زاہد

میں ہو گیا شہید تیغ ادائے خواجہ

خواجہ نگر میں جانا یوں ہو میرا خدایا

دل میں ہو یاد خواجہ لب پر سنائے خواجہ

ہو جائے خاک جل کر خرمن میرے گنہ کا

دل سوزی گر دکھائے برق ادائے خواجہ

ایسی کہاں ہے یارو تقدیر مجھ گدا کی

دربار میں جو مجھ کو اپنے بلائے خواجہ

کوئی نہ بیکسی میں حامی ہوا ہمارا

امداد کو ہمارے آئے تو آئے خواجہ

دہلیز کی تمہارے حاصل ہو جبہ سائی

سر میں یہ دھن سمائی بیٹھے بٹھائے خواجہ

مقبول کیوں نہ اس کے اشعار ہوں جہاں میں

مشہور ہے تجملؔ مدحت سرائے خواجہ