مسجدِ نبوی تو ہی بتا، کچھ سماں وہ کیسا پیارا تھا

مسجدِ نبوی تو ہی بتا، کچھ سماں وہ کیسا پیارا تھا

صحن میں آقا بیٹھے ہوں گے، گِرد اصحاب کا حلقہ ہو گا

دو جگ کے مختار کی باتیں، دین و دانش کی سوغاتیں

اس محفل میں ان پھولوں سے، ہر کوئی دامن بھرتا ہو گا

برمِ نبوت میں صدیق بھی، فاروق و عثمان و علی بھی

چاروں یار ستارے ہوں گے بیچ میں چاند چمکتا ہو گا

ان جلوؤں کے دن بھی تیری یاد کا حصہ ہوں گے جن میں

حَسن، حُسین کا بچپن، نانا کی گودی میں کھیلا ہو گا

تو نے اپنے دروازے پر وہ بھی بچّے دیکھے ہوں گے

جن بچوں نے پیار سے اکثر نبی کا دامن تھاما ہو گا

قربِ حضور میں اہلِ مدینہ کیسی راحت پاتے ہوں گے

دلِ اویس غمِ فرقت سے صبح و شام تڑپتا ہو گا

ارضِ مدینہ! بانگِ بلال سے تیری فضا جب گونجتی ہو گی

اس کے سرور و سوز کی رو میں ہر کوئی بہہ جاتا ہو گا

بہرِ شفاعت جب بھی دعا کو حضرت ہاتھ اٹھاتے ہوں گے

عرشِ مشیت بہرِ اجابت طیبہ پر جُھک جاتا ہو گا ہو

امتِ مرسل میں ہوں طربؔ اور اس رشتے پر نازاں ہوں

اس کی قسمت کا کیا کہنا جو محفل میں بیٹھا ہو گا