عثمان کے گھر دعوتِ سلطان عرب ہے

عثمان کے گھر دعوتِ سلطان عرب ہے

باعث ہے مسرت کا سعادت کا سبب ہے

سامان ضیافت کا جو لازم ہے وہ سب ہے

اس خانۂ پر نور کا فردوس لقب ہے

کس دھوم کی دعوت ہے یہ کس شان کی دعوت

اس گھر میں ہے معراج کے مہمان کی دعوت

اصحاب کو یوں لے کے شہ بحر و بر آئے

جس طرح ستاروں میں قمر جلوہ گر آئے

صدیق و یداللہ بھی آئے عمر آئے

جن جن کو بلایا تھا وہ سب ان کے گھر آئے

نور رخ حضرت سے پر انوار وہ گھر تھا

اصحاب کے ہالے میں رسالت کا قمر تھا

دعوت جو ہوئی ختم علی اپنے گھر آئے

آئے غم و آلام کو لے کر مگر آئے

زہرا کو جو آثار الم کے نظر آئے

پوچھا کہ ہوا کیا جو حزن اس قدر آئے

کیا بات ہے کس رنج سے خاموش ہو حیدر

کیا فکر ہے کس غم سے ہم آغوش ہو حیدر