ہر اک بندہ بھرتا ہے دم آپ کا

ہر اک بندہ بھرتا ہے دم آپ کا

نہیں کس پہ خواجہ کرم آپ کا

جھکیں کیوں نہ شیخ و برہمن یہاں

خدا آپ کا ہے صنم آپ کا

ہزاروں نگاہیں ادھر بچھ گئیں

اٹھا جس طرف بھی قدم آپ کا

کیا مجھ کو ہر ایک سے بے نیاز

دو عالم کی دولت ہے غم آپ کا

ستم کے پڑیں لاکھ پردے تو کیا

کہیں چھپ سکا ہے کرم آپ کا

خدا کی بزرگی دلاتا ہے یاد

یہ روضہ خدا کی قسم آپ کا

کھلا ہم پہ عقدہ یہ اجمیر میں

خدا کا کرم ہے کرم آپ کا

اسی سے تو ہے زندگانی مری

سلامت رہے درد و غم آپ کا

خدا جانے میں کتنے سجدے کروں

جو مل جائے نقش قدم آپ کا

خبر آپ کاملؔ کی لیں یا نہ لیں

وہ ہے بندۂ بے درم آپ کا