آنکھیں ہیں جلو_خانۂ_محبوب_الہی

آنکھیں ہیں جلو خانۂ محبوب الہی

دل کیوں نہ ہو دیوانۂ محبوب الہی

واعظ تری جنت کی قسم دیکھ تو جا کر

فردوس ہے میخانۂ محبوب الہی

روشن ہے مجھی پر مرے جینے کی حقیقت

ہر سانس ہے افسانۂ محبوب الہی

حقا کہ ہے آئینہ انوار دوعالم

اک جلوۂ مستانۂ محبوب الہی

وہ عہد خزاں ہو کہ بہاراں ہو بہر رنگ

واہے در مے خانۂ محبوب الہی

گلشن کو اگر دیدۂ ظاہر ہی سے دیکھو

ہر پھول ہے پیمانۂ محبوب الہی

دولت ہے نگاہوں میں مگر پا نہیں سکتا

بد بخت ہے بے گانۂ محبوب الہی

جب فرط عقیدت سے شکیلؔ آنکھ اٹھائی

تھا سامنے کاشانۂ محبوب الہی