گل_بستان_معشوقی مہ_تابان_محبوبی

گل بستان معشوقی مہ تابان محبوبی

نظام الدین سلطان المشائخ جان محبوبی

فقط کنعان میں یوسف نے پائی عزت و شاہی

تمہیں کونین میں حق نے کیا شایان محبوبی

جو آنکھیں بادۂ عرفاں کے دو لبریز ساغر ہیں

تو ہیں مصرع ابرو مطلع دیوان محبوبی

تمہاری ذات عالی ہے کسوٹی حق شناسی کی

وہی عارف ہیں جو ہیں مرتبہ دانان محبوبی

خدا را جلوہ گاہ ناز میں آ کر خراماں ہو

کہ دل قربان معشوقی ہے جاں قربان محبوبی

نہیں زاہد ہوس دل میں ہمارے ظل طوبیٰ کی

کہ ہے سر میں ہوائے سایۂ دامان محبوبی

دو شمع نور اگر رخسار محبوب الٰہی ہیں

تو لب ہیں آپ کے دو چشمۂ حیوان محبوبی

پئے خواجہ فرید الدین ملے ایک گھونٹ راوی کو

بہت پیاسا ہے یہ اے چشمۂ فیضان محبوبی