دستگیری کا طلب_گار ہوں شیٔاً_للہ

دستگیری کا طلب گار ہوں شیٔاً للہ

میر بغداد میں لاچار ہوں شیٔاً للہ

حال دل شرم سے اب تک نہ کہا تھا لیکن

آج میں در پئے اظہار ہوں شیٔاً للہ

کرم خاص کے لائق تو نہیں ہوں پھر بھی

آپ کا حاشیہ بردار ہوں شیٔاً للہ

آپ ہی سنیے کہ اب اور کہوں میں کس سے

بستۂ دامن سرکار ہوں شیٔاً للہ

جلوۂ پاک نظر آئے تو بر آئے مراد

تشنۂ شربت دیدار ہوں شیٔاً للہ

غوث اعظم سے جو مانگو گے ملے گا حسرتؔ

بس کہو حاضر دربار ہوں شیٔاً للہ