نبی کے جانشیں بن کے جو آئے شاہِ جیلانی

نبی کے جانشیں بن کے جو آئے شاہِ جیلانی

انہیں کی زندگی بھی ساتھ لائے شاہِ جیلانی

ہمیں کس بات کا غم ہے ہمیں کس چیز کا کھٹکا

ہے اپنی زندگی زیر نوائے شاہِ جیلانی

دلِ بیتا ب پر سرکار کی کتنی عنایت ہے

ادھر تڑپا ادھر تشریف لائے شاہِ جیلانی

کمائی عمر بھر کی یا ہماری زیست کا حاصل

اگر کچھ ہے تو بس داغِ ولائے شاہِ جیلانی

نئے انداز کی ایک زندگی محسوس کرتا ہوں

میرا دل جب تڑپتا ہے برائے شاہِ جیلانی

کبھی اس طرح بھی دیتے ہیں وہ اپنے غلاموں کو

نظر آتا نہیں دستِ عطائے شاہِ جیلانی

اگر نسبت سے اُن کی کام لینے کا سلیقہ ہو

تو کیا کچھ کر نہیں سکتا گدائے شاہِ جیلانی

نجف بغداد طیبہ کربلا کیا کیا سمٹ آئے

میری بالیں پہ جب تشریف لائے شاہِ جیلانی

لئیقؔ اُن کے لیے تاریکیٔ مرقد کا ڈر کیسا

کہ جن کے ساتھ ہے شمعِ ولائے شاہ جیلانی