میرے دیں اور میرے ایمان رسولِ عربی

میرے دیں اور میرے ایمان رسولِ عربی

سب سے افضل ہے تری شان رسولِ عربی

ہے ثناگر تیرا سبحان رسولِ عربی

واہ کیا شان ہے کیا شان رسولِ عربی

جب زبردست وسیلہ ہے تمہارا حضرت

کیوں ہراساں ہوں مسلمان رسولِ عربی

گر توجہ ہو تری ذاتِ مبارک کی ذرا

مشکلِ قبر ہو آسان رسولِ عربی

میں تو دنیا میں بھی پھولا نہ سماؤں ہرگز

آپ گر ہوں مرے مہمان رسولِ عربی

مسکن اپنا ہو مدینہ یہ دعا ہے ہر دم

کسی صورت کسی عنوان رسولِ عربی

کس نے اک دم میں کیا ماہِ فلک دو ٹکڑے

کس کے جبریل تھے دربان رسولِ عربی

کس کی لولاک لما شان میں خالق نے کہا

کس کا شیدا ہوا سبحان رسولِ عربی

دیکھ پائے اگر اُس رخ کی تجلی فوراً

گبر ہو جائے مسلمان رسولِ عربی

یوں تجھے ختم رسالت کا ملا ہے تمغہ

عام تا ہو ترا احسان رسولِ عربی

شمسؔ آئے در دولت پہ ترے سر کے بل

اس کی طلبی کا ہو فرمان رسولِ عربی