حقیقت ہیں شہِ ہندوستان خواجہ ہی خواجہ ہے

حقیقت ہیں شہِ ہندوستان خواجہ ہی خواجہ ہے

عمل داری ہے خواجہ کی یہاں خواجہ ہی خواجہ ہے

فلک منزل ملائک آستاں خواجہ ہی خواجہ ہے

مجھے اے دل وہاں لے چل جہاں خواجہ ہی خواجہ ہے

پکارے گر کوئی آفت میں کرتے ہیں مدد اس کی

معاون اور معینِ خستگاں خواجہ ہی خواجہ ہے

زبان سے غنچۂ نرگس آنکھ سے اور سرو انگلی سے

بتاتے ہیں بہارِ بوستاں خواجہ ہی خواجہ ہے

نہیں ہیں شمعِ گل پر شیفتۂ پروانہ بلبل پر

چمن میں انجمن میں دلستاں خواجہ ہی خواجہ ہے

مبارک ہو درِ فردوس کی رضواں کو رضوانی

درِ دِل کا ہمارے پاسباں خواجہ ہی خواجہ ہے

نہ ہم ہم ہیں نہ تم تم ہو نہ اپنا ہے نہ بیگانہ

اگر آئینہ بھی دیکھا عیاں خواجہ ہی خواجہ ہے

نبی کی آل اولادِ علی حسنین کا دل بند

خدا آگاہ علی دو دماں خواجہ ہی خواجہ ہے

معین الدین چشتی کے ہیں زیرِ حکم سب اشیا

سلیماں کی طرح سے حکمراں خواجہ ہی خواجہ ہے

یہ اپنی مہر آصفؔ کم نہیں مہرِ سلیماں سے

نگینِ دل پہ نقشِ جاوداں خواجہ ہی خواجہ ہے