علی مرتضیٰ مشکل کشائے دو جہاں ٹھہرے

علی مرتضیٰ مشکل کشائے دو جہاں ٹھہرے

وہ شاہِ لا فتیٰ خلوت نشینِ لا مکاں ٹھہر

وہ بابِ علم و زور دستِ و بازوئے محمد تھے

وہ شاہِ ذوالفقار و پیشوائے انس و جاں ٹھہرے

اخوت کے ولایت کے امامت کے خلافت کے

حقیقت میں اگر دیکھا تو وہ روحِ رواں ٹھہرے

شجاعت کے سخاوت کے مروت کے محبت کے

وہ دم ٹھہرے وہ خم ٹھہرے وہ دل ٹھہرے وہ جاں ٹھہرے

وہ سب کی سنتے آئے ہیں وہ سب کی سنتے جائیں گے

ازل کے رو ہی سے وہ انیسِ بیکساں ٹھہرے

کچھ اپنے فرزندوں کے صدقے میں عطا کیجے

ازل سے ہم گدا ہیں آپ شاہِ دو جہاں ٹھہرے

ہماری بیکسی کی لاج بھی اب آپ ہی کو ہے

مسیحا ہیں ہمارے آپ اور ہم ناتواں ٹھہرے

ترے حیرتؔ کو جب کوئی ٹھکانا مل نہیں سکتا

کہاں جائے کہاں آئے کہاں بیٹھے کہاں ٹھہرے