مدد کن یا معین_الدین چشتی

بھنور میں آ گئی ہے ناؤ میری

کنارے کی نہیں سدھ بدھ ذرا بھی

اندھیری رات ہے ہر سمت طاری

یہی کہتا ہوں میں ولیوں کے والی

بہ گرداب بلا افتادہ کشتی

مدد کن یا معین الدین چشتی

نہ ملاح غائب نا خدا ہے

نہ کشتی کا نہ لنگر کا پتہ ہے

جو ہے اس وقت وہ نا آشنا ہے

مرے خواجہ عجب وقت آ پڑا ہے

بہ گرداب بلا افتادہ کشتی

مدد کن یا معین الدین چشتی

ہوئے بیگانے سب اپنے پرائے

کسے ہمدم کوئی اپنا بنائے

کسے داغ جگر کوئی دکھائے

سنے گا کون اب تیرے سوائے

بہ گرداب بلا افتادہ کشتی

مدد کن یا معین الدین چشتی

نہیں ہے صبر جان مبتلا میں

مہ امید ہے کالی گھٹا میں

اثر دے دے خدا میری دعا میں

کہ ہوں مصروف میں اس التجا میں

بہ گرداب بلا افتادہ کشتی

مدد کن یا معین الدین چشتی

دیار ہند کے والی تمہیں ہو

فقط درمان پامالی تمہیں ہو

ریاض ہند کے مالی تمہیں ہو

تمہیں ہو خواجۂ عالی تمہیں ہو

بہ گرداب بلا افتادہ کشتی

مدد کن یا معین الدین چشتی

مرا ارمان دل برائے خواجہ

مرا دل اب نہ کچھ دکھ پائے خواجہ

مصیبت دور سب ہو جائے خواجہ

یہی میری دعا ہے ہائے خواجہ

بہ گرداب بلا افتادہ کشتی

مدد کن یا معین الدین چشتی