دونوں عالم میں نہیں ایک بھی ہمتا تیرا

دونوں عالم میں نہیں ایک بھی ہمتا تیرا

مرحبا صلِ علیٰ جلوۂ یکتا تیرا

عین تنزیہ ہے تشبیہ میں تیرا رتبہ

ہے سرا پردۂ تقدیس سراپا تیرا

راحتِ روحِ حزیں زلفِ سمن سا تیری

مرہمِ زخم جگر حسنِ نمک سا تیرا

کھل گئے معنی اللہ جمیلٌ سب پر

اللہ اللہ جمالِ رُخِ زیبا تیرا

نہ رہے پھر ہوس روضۂ رضواں باقی

خواب میں بھی نظر آجائے جو روضہ تیرا

چشمِ بیمار ہو اور خاکِ شفائے طیبہ

سرسودا زدہ ہو اور جلوۂ یکتا تیرا

دلِ بیتاب ہو اور گرمیٔ الفت تیری

چشمِ مشتاق ہو اور جلوۂ یکتا تیرا

جانماز اپنی ہو اُس کوچۂ اطہر کی زمیں

بنے محرابِ حرم نقشِ کفِ پا تیرا

جلوۂ عارضِ پُر نور ہو قبلہ اپنا

کھول دے سرِّ حقیقت رُخِ زیبا تیرا

خاک ہو جاؤں درِ پاک پہ تیری گِر کر

جلوۂ طور ہو میرے لئے جلوا تیرا

تاقیامت نہ قضا ہو ترے کوچہ کا طواف

خاک تسخیرؔ ہو اور شہرِ مدینہ تیرا