اے فقیر بے نوا بانسری بجائے جا

دیکھو نکلا آفتاب رات کی جا چکی رات

بانسری کی دھن میں ہے گوش بہ نغمہ کائنات

کیا ہی دل فریب ہے تیری بانسری کی بات

کرنیں ناچنے لگیں بانسری کے سر کے ساتھ

اے فقیر بے نوا بانسری بجائے جا

اپنی بانسری ملا نغمۂ حجاز سے

ہو حقیقت آشنا صورت مجاز سے

کہنا ہو درد دل اگر شوخ مست ناز سے

بھیرویں راگ چھیڑ سوز اور گداز سے

اے فقیر بے نوا بانسری بجائے جا

تیرا گذر محال ہے خستہ دل اس مکان تک

سیکڑوں بے نشاں ہوئے مل نہ سکا نشان تک

جا نہیں سکتا اس جگہ گر چہ تیرا گمان تک

پر تیرے درد کی صدا پہنچے گی اس کے کان تک

اے فقیر بے نوا بانسری بجائے جا