باغِ جنت کے ہیں بہرِ مدح خوانِ اہلِ بیت

باغِ جنت کے ہیں بہرِ مدح خوانِ اہلِ بیت

تم کو مژدہ نار کا اے دشمنانِ اہلِ بیت

کس زباں سے ہو بیانِ عزو شانِ اہلبیت

مدح خوانِ مصطفیٰ ہے مدح خوانِ اہلِ بیت

ان کی پاکی کا خدائے پاک کرتا ہے بیاں

آیۂ تطہیر سے ظاہر ہے شانِ اہلِ بیت

مصطفیٰ عزت بڑھانے کے لیے تعظیم دیں

ہے بلند اقبال تیرا، دردمانِ اہلِ بیت

ان کے گھر میں بے اجازت جبرئیل آتے نہیں

قدر والے جانتے ہیں قدر و شانِ اہلِ بیت

رزم کا میداں بنا ہے جلوہ گاہِ حسن و عشق

کربلا میں ہو رہا ہے امتحانِ اہلِ بیت

حوریں کرتی ہیں عروسانِ شہادت کا سنگھار

خوبرو دولہا بنا ہے ہر جوانِ اہلِ بیت

جمعے کا دن ہے کتابیں ریست کی طے کر کے آج

کھیلتے ہیں جان پر شہزادگانِ اہلِ بیت

اے شبابِ فصلِ گل یہ چل گئی کیسی ہوا

کٹ رہا ہے لہلہاتا بوستانِ اہلِ بیت

کس شقی کی ہے حکومت ہائے کیا اندھیر ہے

دن دہاڑے لٹ رہا ہے کاروانِ اہلِ بیت

خشک ہو جا خاک ہو کر خاک میں مل جا فرات

خاک تجھ پر دیکھ تو سوکھی زبانِ اہلِ بیت

تیری قدرت جانور تک آب سے سیراب ہوں

پیاس کی شدت سے تڑپے بیزبانِ اہلِ بیت

فاطمہ کے لاڈلے کا آخری دیدار ہے

حشر کا ہنگامہ برپا ہے میانِ اہلِ بیت

وقتِ رخصت کہہ رہا ہے خاک میں ملتا سہاگ

لو سلامِ آخری اے بیوگانِ اہلِ بیت

کس مزے کی لذتیں ہیں آبِ تیغِ یار میں

خاک و خوں میں لوٹتے ہیں تشنگانِ اہلِ بیت

باغِ جنت چھوڑ کر آئے ہیں محبوبِ خدا

اے زہے قسمت تمہاری کشتگانِ اہلِ بیت

گھر لٹانا جان دینا کوئی تجھ سے سیکھ جائے

جانِ عالم ہو فدا اے کاروانِ اہلِ بیت

دولتِ دیدار پائی پاک جانیں بیچ کر

کربلا میں خوب ہی چمکی دکانِ اہلِ بیت

زخم کھانے کو تو آبِ تیغ پینے کو دیا

خوب دعوت کی بلا کر دشمنانِ اہلِ بیت

اہلِ بیتِ پاک سے گستا خیاں بے باکیاں

لعنتہ اللہِ علیکم دشمنانِ اہلِ بیت

بے ادب گستاخ فرقے کو سنا دے اے حسنؔ

یُوں کہا کرتے ہیں سنی داستانِ اہلِ بیت