فخرِ پیمبر ہادی و رہبر صلی اللہ علیہ وسلم

فخرِ پیمبر ہادی و رہبر صلی اللہ علیہ وسلم

خلق میں بہتر خُلق میں برتر صلی اللہ علیہ وسلم

عالی نسب ہے والا حسب ہے امی لقب ہے شاہِ عرب ہے

دلبر رب ہے عاشق داور صلی اللہ علیہ وسلم

باعثِ خلقت مہرِ نبوت شمعِ ہدایت فخرِ رسالت

حامیٔ امت ساقیٔ کوثر صلی اللہ علیہ وسلم

مرسل و واصل منصف و عادل ذاکر و شاغل فاضل افضل

کامل و اکمل طاہر و اطہر صلی اللہ علیہ وسلم

مہرِ مبیں تم ماہِ جبیں تم سب سے حسیں تم حق سے قریں تم

سروردیں تم ساقیٔ کوثر صلی اللہ علیہ وسلم

ہادیٔ برحق مرسلِ صادق دلبرِ خالق شافع مطلق

لایق وفائق دین کے افسر صلی اللہ علیہ وسلم

آیۂ رحماں سورۂ فرقاں شمع شبستاں مہرِ درخشاں

کعبۂ ایماں قبلۂ اطہر صلی اللہ علیہ وسلم

بلبل وحدت خوشہ قدرت سایۂ عظمت چشمۂ رحمت

گلشنِ فرحت بوئے معطر صلی اللہ علیہ وسلم

آپ یہاں ہو آپ وہاں ہو آپ نہاں ہو آپ عیاں ہو

عرشِ مکاں ہو دین کے سرور صلی اللہ علیہ وسلم

یوسفِؔ خستہ پائے شکستہ سینہ برشتہ بادلِ تفتہ

شاہِ خجستہ در پہ ہے حاضر صلی اللہ علیہ وسلم