دکھا دو چہرۂ رشکِ قمر محبوبِ سبحانی

دکھا دو چہرۂ رشکِ قمر محبوبِ سبحانی

تڑپتا ہے یہ دل شام و سحر محبوب سبحانی

تمہاری یاد میں بہتے ہیں آنسو چشمِ گریاں سے

لبوں پر آہ ہے آٹھوں پہر محبوبِ سبحانی

تمہارا خلق میں شہرہ ہے تم اولادِ حیدر ہو

رسول اللہ کے جان و جگر محبوبِ سبحانی

کوئی مونس نہیں یارو نہیں بے یار و یاور ہوں

مری محشر میں لے لینا خبر محبوبِ سبحانی

تمہارے واسطے ہر دم دلِ مضطر تڑپتا ہے

وظیفہ ہے مرا شام و سحر محبوبِ سبحانی

گھڑی بھر میں نکل جائیں مرادیں زندگی بھر کی

دکھادو خواب میں صورت اگر محبوبِ سبحانی

تمہارے نام سے ہے اس دلِ بیتاب کو تسکیں

تمہیں ہو مرہم زخم جگر محبوب سبحانی

مددگارِ دو عالم میں تمہارا نام لیوا ہوں

مری حالت پہ بھی ہو ایک نظر محبوبِ سبحانی

دل و جاں سے ادا پر آپ کی قربان ہوں جاؤں

جو بن ٹھن کر کبھی آؤ ادھر محبوبِ سبحانی

برات اک آن میں تم نے نکالی ساز و ساماں سے

کہا بڑھیا نے جب با چشمِ تر محبوبِ سبحانی

بلالو ہند سے بغداد میں در در بھٹکتا ہوں

پھراتے ہو مجھے کیوں دربدر محبوبِ سبحانی

یقیں ہے جان مضطر راہئ ملکِ عدم ہوگی

یوں میں تڑپا جدائی میں اگر محبوبِ سبحانی

تڑپتا ہوں سِسکتا ہوں میں اس دردِ جدائی سے

برائے حق مری لینا خبر محبوبِ سبحانی

ستانے پائیں مرقد میں نہ مجھ عاصی کو کرّوبی

بچا لینا وہاں تم آن کر محبوبِ سبحانی

تَہ و بالا ابھی ہوجائے گا یہ عالمِ بالا

اگر نالا کروں دل کھول کر محبوبِ سبحانی

غم دوری سے جاں پر آ بنی واللہ مرتا ہوں

خبر للہ لیجئے جلد تر محبوبِ سبحانی

خدا کے واسطے درگاہِ والا پر بلا لیجئے

بھٹکتا پھرتا ہوں شام و سحر محبوبِ سبحانی

تمہاری یاد میں ہر دم دلِ مضطر تڑپتا ہے

کہاں جاؤں تمہیں ڈھونڈوں کدھر محبوبِ سبحانی

مدد کیجئے خدا کے واسطے عسرت نے گھیرا ہے

بڑی مشکل سے ہوتی ہے بسر محبوبِ سبحانی

اسی در کا بھکاری اور اسی ڈیوڑھی کا سائل ہوں

تمہیں سے لوں گا گنج و مال و زر محبوبِ سبحانی

غم و رنج و الم میں درد میں اکثر مصیبت میں

تمہیں نے لی ہے بندہ کی خبر محبوبِ سبحانی

اٹھوں دنیا سے میں جس دم مری اس دم خبر لینا

بحقِ حضرتِ خیرالبشر محبوبِ سبحانی

کل آنا غیر ممکن ہے دلِ بیتاب کو میرے

کہ تھمتاہی نہیں دردِ جگر محبوبِ سبحانی

نہ آتے ہو نہ اپنے پاس تک اس کو بلاتے ہو

کہو کیوں کر جئے یہ نوحہ گر محبوبِ سبحانی

دکھا جاؤ کسی صورت اگر تم چاند سی صورت

گرا دوں اپنی نظروں سے قمر محبوبِ سبحانی

شبَ فرقت نہیں کٹتی نہیں کٹتی نہیں کٹتی

نہیں ہوتی نہیں ہوتی سحر محبوبِ سبحانی

مرے آقا مرے مولیٰ مرے مالک مرے خواجہ

نہالِ گلشنِ خیرالبشر محبوبِ سبحانی

بلالو ہند سے مجھ کو اڑا کر باغِ جیلاں میں

میں ہوں اک بلبلِ بے بال و پر محبوبِ سبحانی

خدا پہنچا دے گر مجھ کو تمہارے آستانہ تک

نہ چھوڑوں پھر وہ چوکھٹ عمر بھر محبوبِ سبحانی

بہارِ مطلعٔ ثانی دکھاؤں مدحِ آقا میں

پڑھوں صبح و مسا شام و سحر محبوبِ سبحانی