وہ قدردانِ شوقِ محباں نہیں رہا

وہ قدردانِ شوقِ محباں نہیں رہا

یعنی وہ حرز جانِ مریداں نہیں رہا

اب ہم میں اور درد جدائی کی آفتیں

بیماریِ فراق کا درماں نہیں رہا

محسن وہ عطر بیز گل شاخِ اکبری

مہکا ہوا تھا جس سے گلستاں نہیں رہا

وہ ضوفشاں چراغِ شبِ تار بے کسی

تھا جس سے میرے گھر میں چراغاں نہیں رہا

خار و خسِ چمن پہ تھیں جس کی بخششیں

وہ نو نہال گلشنِ عرفاں نہیں رہا

وہ ضوفشانیاں وہ ضیا پاشیاں کہاں

اس کارواں کا یوسف کنعاں نہیں رہا

آقا کہاں نصیب ہو اس شان کا وفاؔ

جس کا کوئی غلام پریشاں نہیں رہا