جنابِ غوثِ اعظم آپ ہیں محبوبِ سبحانی

جنابِ غوثِ اعظم آپ ہیں محبوبِ سبحانی

مدد فرمائیے تا دور ہو میری پریشانی

عجب کیا ہے اگر اس گوشۂ ابرو کو جنبش ہو

کہ میری مشکلیں اب ڈھونڈتی ہیں شکلِ آسانی

یہ میں بھی جانتا ہوں کام میرے کچھ نہیں اچھے

مگر جب آپ ہیں حامی اٹھاؤں کیوں پشیمانی

مجھے امید ہے خود ہوں گے حضرت دستگیرِ دل

ادا کرنے نہ دے مطلب کو شاید شوقِ پنہانی

نگاہِ لطف اگر ہوجائے مجھ پر پھر ہے نا ممکن

کہ قلت عیش کی میں دیکھوں اور غم کی فراوانی

محامد آپ کے لکھوں بھلا میری حقیقت کیا

کہ سارے اولیا کرتے ہیں حضرت کی ثنا خوانی

مرکب ہو جو نورِ احمدی سے اس کا کیا کہنا

ہے وہ ذاتِ مقدس سر بسر انوارِ یزدانی

بتائے آپ کے کوچہ کا رہرو خضر کو رستہ

دکھائے آپ کے در کا گدافتر سلیمانی

وجودِ پاک نادر گل ہے گلزار ولایت کا

جہانِ رنگ و بو میں کس نے دیکھا آپ کا ثانی

ہوئی ہے رونقِ دین پیمبر ذاتِ عالی سے

بجا ہے آپ کی شہرت محی الدین جیلانی

غلام معتقد ہے آپ کا یہ وحشتِؔ عاصی

عنایت کی نظر اس پر ہو اے محبوب سبحانی