ہو روز سفر میرا، پھر لطف ہے جینے میں

ہو روز سفر میرا، پھر لطف ہے جینے میں

اک سجدہ ہو مکے میں، اک سجدہ مدینے میں

میں غارِ حرا جاؤں، قدموں کے نشاں چوموں

یوں روز اضافہ ہو، ایماں کے دفینےمیں

حوروں کے گرے آنچل، حیراں ہیں ملائک بھی

سجدے ہی بنے سیڑھی، معراج کے زینے میں

چہرہ بھی ترا خوشبو ، لہجہ بھی ترا خوشبو

اللہ کی رحمت کی، خوشبو ہے پسینے میں

لے نامِ خدا پہلے، پھر نامِ محمد لے

کل کے لیے سب کچھ ہو، ایماں کے خزینے میں

تبلیغ کے جلسے ہوں، توحید کے چرچے ہوں

انسان نیا جاگے، انسان کے سینے میں

اس جسم کی قیمت کیا، اس روح کی عظمت کیا

جس لب پہ نہ ہو کلمہ، ایماں نہ ہو سینے میں