میں ہوں جنونِ با خبر یعنی کہ چاک بخیر گر

میں ہوں جنونِ با خبر یعنی کہ چاک بخیر گر

جان و جگر تیری نظر دم ہمہ دم علی علی

یادِ خدا علی علی اذنِ خدا علی علی

شیرِ خدا علی علی دم ہمہ دم علی علی

تو ہی حیاتِ کشتگاں تو ہی سرورِ جاوداں

صورت گرِ قلندراں دم ہمہ دم علی علی

تو ہی یقین بے گماں یعنی نشانِ بے نشاں

تو ہی امیرِ کارواں دم ہمہ دم علی علی

تیرا نشاں بلند ہے عرشِ رواں سمند ہے

ہر دو جہاں کمند ہے دم ہمہ دم علی علی

باغِ ارم کی قمریاں حسنِ قدم کی طوطیاں

گویا زبانِ بے زباں دم ہمہ دم علی علی

وسعتِ علم کا ہے در تجھ سے کھلی نظر نظر

رازِ نہاں سے باخبر دم ہمہ دم علی علی

تو ہی وصی نورِ عین تو ہی امامِ قبلین

یعنی تیرے حسن و حسین دم ہمہ دم علی علی

سرمۂ حق کا نور ہے یعنی تیرا ظہور ہے

دور کہاں یہ طور ہے دم ہمہ دم علی علی

حسن تیرا ہے الکتاب اے کہ شہِ ابو تراب

مست بنا پلا شراب دم ہمہ دم علی علی

اے کہ امام ہر جہاں واصفِؔ خستہ جاں کہاں

تیرا ہے اذن وہ اذاں دم ہمہ دم علی علی