اے شہِ ہر زماں یعنی فخرِ بیاں تو امامِ جہاں کیا تیری شان ہے

اے شہِ ہر زماں یعنی فخرِ بیاں تو امامِ جہاں کیا تیری شان ہے

بے زباں کی زباں یعنی علمِ نہاں تو یقیں بے گماں کیا تیری شان ہے

ہر طرف جلوہ گر تیرا فیضِ نظر تو ہی نورالبصر کیا تیری شان ہے

اے کہ گنجِ ہنر یعنی باب الخبر تو عجب رازداں کیا تیری شان ہے

تیرے در سے ملی چاند کو روشنی ادنیٰ ذروں کو سوزش تپش مل گئی

جس طرف بھی نگاہِ کرم ہوگئی ہوگیا شاہ جہاں کیا تیری شان ہے

اؤلیائے جہاں تجھ کو مانیں ولی تو نے بخشی انہیں دلبری سروری

ورد تیرا کریں یا علی یا علی تو نشان بے نشاں کیا تیری شان ہے

ایک سرمد ہی کیا تیرا منصور ہے صابرِ باصفا تیرا ہی نور ہے

بو علی شاہ بازی کا دستور ہے تو فصیح البیاں کیا تیری شان ہے

راز ساز انا الحق ترا نام ہے تیری ٹھوکر سے بھرتا ہر اک جام ہے

بس قلندری گری تیرا ہی کام ہے تو ہمہ عارفاں کیا تیری شان ہے

تو جھکے آسماں جھک کے سجدہ کرے تو اٹھے تو زمیں اٹھے تعظیم سے

سر نگوں بابِ خبر ہے کہ ضرب سے تو یداللہ عیاں کیا تیری شان ہے

تیرے قدموں میں واصفؔ کو مستی ملی تیرے فیضِ کرم سے ہوا ہے ولی

کس کو ہمت کہ اس کو کہے کچھ کوئی ہوگیا جانِ جاں کیا تیری شان ہے