عجب ہے تری شان و اجلال و شوکت جدا ہے تری بات مخدوم اشرف

عجب ہے تری شان و اجلال و شوکت جدا ہے تری بات مخدوم اشرف

ترا نامِ راحت رساں ہے یقینا دفیع مہمات مخدوم اشرف

ترے سر ہے دستارِ اوج و ترفع ہے تیری جہاں گیریت میں تنوع

خدا داد قوت پہ مبنی ہے بے شک ترا شجرۂ ذات مخدوم اشرف

ہے زیبا تجھے دستگیری و بخشش ہے جاری ترا بحرِ لطف و نوازش

دوانے ہی کاسہ بکف در پہ کب سے ہو چشم عنایات مخدوم اشرف

نسیم گلستانِ ارض کچھوچھہ ہے آلودگی خزاں سے معریٰ

مثال مہ و کہکشاں، نور آگیں ہیں چوکھٹ کے ذات مخدوم اشرف

مسلم ہے تیرا تصرف جہاں پر عیاں ہے تری تکمنت انس و جاں پر

ہیں ٹوٹے پڑے تیرے سنگ غضب سے زجاج طلسمات مخدوم اشرف

دہائی اے آرام قلب مسلماں مصائب ہمارے ہوں ہم سے گریزاں

فضا میں ہے تحلیل زہرِ تشدد دگر گوں ہیں حالات مخدوم اشرف

حضوری کی ہے کیفیت جسم و جاں پر عجب بے خودی ہے ترے آستاں پر

تمنائے دیدار دل میں ہے پنہاں ہو کشفِ حجابات مخدوم اشرف

ہے وابستہ روضۂ نور واصفؔ میسر اسے بھی ہو جام معارف

تری مدح گوئی کے فیضان سے ہوں درخشاں خیالات مخدوم اشرف