فرش سے عرش تک جلوہ آرا نبی
فرش سے عرش تک جلوہ آرا نبی
ہر فضا پر ہوا آشکارا نبی
رحمتوں کا مجسم سنوارا نبی
چشمِ قدرت کا رنگیں نظارا نبی
چاند کا چاند تاروں کا تارا نبی
دونوں عالم میں چمکا ہمارا نبی
پائے رنگیں پہ حوروں کی قرباں پھبن
چال پر نہرِ تسنیم ہو گامزن
رخ کا صدقہ ہے فردوس کا بانکپن
ذکر ہے روزوشب یہ چمن در چمن
چاند کا چاند تاروں کا تارا نبی
دونوں عالم میں چمکا ہمارا نبی
وہ تبسم کھلے جیسے نازک کنول
دیکھ لے جو کلی اس کو آئے نہ کل
درِّ دنداں صدف میں گہر بر محل
مست آنکھیں وہ فردوس کا ماحصل
چاند کا چاند تاروں کا تارا نبی
دونوں عالم میں چمکا ہمارا نبی
آمدِ شاہِ کونین اِدھر ہوگئی
بزم کفّار کی منتشر ہوگئی
ہاشمی خانداں کو خبر ہوگئی
صبح سے پہلے سب کی سحر ہوگئی
چاند کا چاند تاروں کا تارا نبی
دونوں عالم میں چمکا ہمارا نبی
کھیت سوکھے ہوئے لہلہانے لگے
پیڑ قدموں پہ سر کو جھکانے لگے
صف بہ صف در پہ لوگ آنے جانے لگے
نوری پیغام جبریل لانے لگے
چاند کا چاند تاروں کا تارا نبی
دونوں عالم میں چمکا ہمارا نبی
جہل آنسو بہا کر سسکنے لگا
کفر خلوت میں سر کو پٹکنے لگا
آفتابِ نبوت چمکنے لگا
نور ظلمت کدوں سے چھلکنے لگا
چاند کا چاند تاروں کا تارا نبی
دونوں عالم میں چمکا ہمارا نبی
منتطر ہے بہت لامکاں کا مکیں
شوقِ دیدار کو تابِ فرقت نہیں
دے کے پیغامِ معراج روح الامیں
عرض فرمایا اے شاہِ دنیا ودیں
چاند کا چاند تاروں کا تارا نبی
دونوں عالم میں چمکا ہمارا نبی
سجدۂ شکر ادا جب کہ فرما چکے
بیٹھ کر تیز رف رف پہ فر فر چلے
اس طرح چرخ سے جیسے بجلی گرے
آپ فرشِ زمیں سے فلک پر گئے
چاند کا چاند تاروں کا تارا نبی
دونوں عالم میں چمکا ہمارا نبی
چاند و سورج نے بڑھ بڑھ کے چومے قدم
با ادب کہکشاں نے کیا سر کو خم
صف بہ صف اس طرح قدسیانِ حرم
جیسے خدّام اور مالکِ محتشم
چاند کا چاند تاروں کا تارا نبی
دونوں عالم میں چمکا ہمارا نبی
مدعی ہو کے خود مدّعا تک گیا
بندگی کر کے اپنے خدا تک گیا
فرش سے سِدرۃ المنتیٰ تک گیا
انتہا یہ کہ حدِّ وفا تک گیا
چاند کا چاند تاروں کا تارا نبی
دونوں عالم میں چمکا ہمارا نبی
حسن اور عشق میں بات ہونے لگی
بخششوں سے مُدارات ہونے لگی
گُم بہم ذات میں ذات ہونے لگی
یعنی جلووں کی برسات ہونے لگی
چاند کا چاند تاروں کا تارا نبی
دونوں عالم میں چمکا ہمارا نبی
حسبِ حاجاتِ دل مدّعا مل گیا
بخششوں کا ہر اک سلسلہ مل گیا
کیا کہے کوئی واصفؔ کہ کیا مل گیا
اس کا سب کچھ ہے جس کو خدا مل گیا
چاند کا چاند تاروں کا تارا نبی
دونوں عالم میں چمکا ہمارا نبی
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
